الزواج اختياري أم قسمتي ونصيبي؟

هل الزواج قسمة ونصيب؟ 

القسمة والنصيب كلمة بتردد على لسان كتير وواخدنها شماعة عشان يداروا بيها

على سوء اختياراتهم.

نعم يا صديقي سوء الاختيار للشخص الذي تكمل معه حياتك وليس ليكمل عليك

حياتك (ينكد عليك عيشتك باللغة العامية)

سبب المقالة دي عشان أوضح الأمور تحدث في العديد من الجلسات الكوتشينج

للسيدات والبنات المتزوجات ففي مرحلة الانهيار النفسي والنكد الزوجي يرددن

"قسمتي ونصيبي" العديد والعديد وحتى الرجال أيضًا يردودها "قسمتي ونصيبي"

ولا يعترف بسوء اختياره أو بسوء تفكيره للزواج في تلك المرحلة.

 

قصة متصلة منهارة من البكاء 

    1jpg

ولكن قبل سرد الموضوع سأروي لكم قصة لفتاة من الحالات:

رن جرس الهاتف إذ بامراة منهارة ومن الواضح بكاءها الهستيري وتطلب أن تتحدث معي واتفقنا على الميعاد وتم بيننا الحديث التالي:

اسمي مدام ص متزوجة من سبع سنوات ولدي توأم أولاد وطفلة عمرها سنتين.

 

طب حضرتك ايه المشكلة عشان أقدر أساعدك بدأت في سرد القصة التالية:

القسمة والنصيب وقعتني في الزواج من راجل بخيل ومش بيرضى يدفع أي فلوس ليا أو لأولاده وكمان بيجبرني على الشغل وإني أصرف على البيت ووصل بيه إنه يقولي مش مهم تشتغلي المهم انك متطلبيش مني فلوس!

 

عملنا أكتر من مرة جلسات عائلية ويتعدل أسبوع أسبوعين وممكن شهر على الأكتر ويرجع تاني بخل وقرف! أنا المسئولة عن كل حاجة وهو يكنز الفلوس.

 

في الأول كنت بأعذره وبأقول إنه معهوش وعلى قده وربنا يفرجها لحد ما اكتشفت كارثة كبيرة خلتني مقدرش أستحمل وأتمنى إني أقتله على كل يوم ادّعى فيه الفقر عليا ومارس بخله عليا وعلى أولاده!

وأنا بافضي هدومه لاقيت كشف حساب بنك باسمه رقم حسابه في البنك يا مستر 2 مليون جنيه غير إن عنده اراضي وعقارات!!!

يعني مشغلني ومكفر سيئاتي وخلا أبويا يدفع مصاريف الولادة وكمان أهلي

جابوا لعيالي اللبس واللعب وأهله مجبوش حتى منديل! وفي الاخر أكتشف انه

بيحوش على قفايا أنا وعيالي والمصيبة الأكبر مش عارف أقول له ايه واخد حقي

ازاااي؟!!!!

---

إياكم والبخيل! 

stingy husband 1 1jpg

استوقفني حديثها فقد كنت سمعته درسًا لأحد المشايخ يوصي أهل البنات والبنات أنفسهن قائلًا إياكن والزواج من البخيل فإنها أقبح صفة فالبخيل بخيل في كل شئ والبخيل بخيل في ماله ومشاعره وعواطفه. كما أن البخل سبب لأكتر من 60 صفة سيئة بدءًا من الجبن حتى الدياثة أعاذكم الله والكذب والهروب! 

---

ردي على مشكلتها:

 

بعد أن استمتعت إليها كنت محتاج أفهم ملابسات زواجهم نفسه لأنها كانت طول

السيشن (session) تردد "أصله قسمتي ونصيبي" وملاحظ أنها متعلمة تعليم راقي وأنها من عيلة متيسرة الحال ولكن فكرة إنها وقعت فيه ليه! هي ما كانتش عايزة تعترف إنه اختيارها!

فبدأت معاها من البداية وسألتها: ممكن حضرتك تحكي لي عرفتي جوزك ازااااي واتعرفتوا على بعض فين ؟

-         بدأت القصة إنه جواز صالونات وأهله يعرفوا بعض لأن أمه صديقة أمي ومن عيلة غنية وهو شغال وبيسافر برة كتير وأنا كان نفسي أسافر وأتحرر وأخرج رغم إن أهلي سايبني براحتي!

-         يعني وافقتي عشان تسافري معاه !!!!!!

-         لا ما أقصدش بس قلت أهالينا عارفين بعض وهو مرتاح ماديًا وعنده عربية حديثة وشقة في منظقة راقية وشغله كويس وكدة

-         طب بالنسبة للبخل دة، ظهر امتى أو عرفتي ازااااي ما هو أكيد كان فيه رسايل قبل الجواز بتقولك بوضوح إنه بخيل

-         بصراحة أنا اكتشتف دة وقلت بيني وبين نفسي حيتغير بعد الجواز، المهم إنه بيحبني وإنه عايزني ومرضتش أرفضه للمرة الرابعة فقلت أتجوزه وخلاص

-         مرة رابعة ؟!!! و أنتي كنتي بترفضيه ليه علشان يتقدم للمرة الرابعة؟

-         لا هو اتقدم مرة واحدة بس أمه كانت بتعرض الأمر على أمي أكتر من مرة وأنا بأرفض بس لما هو اتقدم رسمي وبنفسه وافقت مكنتش حابة أرتبط بحد من اختيار أهله أو أهلي نبقى احنا اختارنا بعض.

-         واكتشفتي البخل امتى؟

-         لما نبقى في خروجة فيها فسحة أو نتمشى كان بيخلق عذر عشان ما نتقابلش. ولو روحنا مكان ويجي وقت الحساب ألاقيه نسي المحفظة في العربية أو وقعت منه ......الخ

فترة خطوبتنا لم تتجاوز الشهرين وكنا متجوزين وأهله كانوا مستعجلين جداا

لدرجة إني استغربت وأهلي كانوا فرحانين لأني أول فرحتهم. وكان أول شهرين كويس فيهم لحد ما. وبعد كدة بقى بدأ في القرف! وبدأ يسألني "أنتي مهاراتك ايه؟ ما تشتغلي بدل قاعدة البيت."

في البداية فرحت إنه بيشجعني ولكن تلك هي البداية يا أستاذي وبالفعل اتوسط لي في إحدى الشركات الكبرى للعمل فيها في الحسابات. فأنا خريجة جامعة أمريكية ومعي جنسية تانية غير المصرية وكمان بأتحدث ثلاث لغات ولكن بدأت العمل بالشركة وبدأت أعذاره للمصروف تزيد حتى إنه قال لي: "يا حبيبتي حصلت لي أزمة في الشغل ومعرض للإفلاس وأزمة وبدأ في اختراع الأكاذيب حتى جاء خبر الصادم لي.

تعبت تعب شديد وذهبت مع والدتي لدكتورة أمراض النساء وبشرتني بأني حامل للشهر الثالث. كنت أطير من الفرح والسعادة سأكون أمًا لولدين. ولكنه حينما علم بذلك

صرخ في وجهي وطلب مني أن أؤجل الإنجاب وأتخلص من المولود وتلك كانت

القشة التي قصمت ظهر البعير فقالي لي نحن في أزمة ونحن ونحن ....... الخ

ولكني تمسكت بحقي في الإنجاب والأهم طلبت منه الطلاق طالما مش عايز عيال مني!

ولكنه جبان لأنه كاتب قايمة بنص مليون جنيه ومثله مؤخر ولكنه يعلم طيبة أهلي، فتراجع عن موقفه ولكنه قالها صراحة: "اصرفي بقى على عيالك ومليش دعوة ومش معايا"

كتمت غيظي ولعنت حظي ولكن قلت نعيش واستحمل طالما هو في أزمة.

كان المتابعات مع الدكتورة على حساب أمي التي رأفت بي لحد يوم الولادة وطبعا

مقولتش له إن الأطفال توأم سيبتها مفاجأة.

أهله سايبينه وهاملينه وهو طايح ببخله على بنات الناس! فقلت أصبر وإعيش وإن شاء الله ربنا يكرمني فيهم.

-         وما طلبتيش الطلاق ليه؟ يعني هو في حياتك ملوش لازمة! دي مش علاقة آدمية! ليه كملتي وكمان جبتي طفلة تانية؟؟؟ الواضح إنك بتحبيه مش بتكرهيه وأكيد بدأتي تاخدي من صفاته!

(سكتتت واعترضت وبدأت في البكاء فقلت لها أليست قسمتك نصيبك؟؟ فين اختيارك وفين عقلك؟؟!!!)

 

بعد نقاش طويل والحمد لله قدرت أساعدها وتبقى أقوى وأفضل واعترفت السيدة

إن غلطتها في سوء الاختيار ومش القسمة والنصيب.

 

هل الزواج اختيار أم قسمة ونصيب؟

نرجع بقى للقضية الجدلية هل الزواج فعلاااا قسمة ونصيب ولا اختيار؟؟ ولا هو ايه بالظبط؟؟؟

عمومًا الإجابة اللي ارتحت ليها وأقربها للحقيقة أن كل شئ فى علم الله مقدر

ولكن مرتبط باختيارك لتمام العدل.

 

الحالة اللي فاتت كان عندها اختيارات غيره ولكن هي اختارته هو وبعد كدة

عشان ما تعترفش بخطأها خدت من "القسمة والنصيب" شماعة.

 

أشرح لك من خلال فهمي البسيط الجملة اللي قلتها لكم معناها ايه:

الشخص بيبقى له أكتر من طريق من قدر الله له ولكن "هو من يختار الطريق" بين عدة طرق موجودة ولذلك الدعاء يغير من القضاء وكل أفعالك الاختيارية أنت

محاسب عليها وأفعالك غير الاختيارية لا تُحاسَب عليها زي: دقات قلبك، وتنفسك كل دة إجباري وليس اختياري.

 

إنما في الزواج دة اختيار عشان كدة ليا كلمة مهمة: ربنا سبحانه وتعالى خلقنا

عشان نكمل بعض ونساعد بعض. أي علاقة حترهقك وتكملها عشان خاطر أولاد

أو كلام الناس أو الاهل مُصِرين أو معتبرينه عار! أوقف العلاقة دي وارفع شعار

"طظ في كل حاجة" المهم سلامك النفسي وهدوءك دة بكنوز الدنيا.

 

الجواز اختيار وعشان كدة اختاروا اللي شبهكم في صفاتكم وأرواحكم اختاروا اللي يكون سند ليكم ويكونوا مهتمين. وارجع لوصية الشيخ إياكم والبخيل صعب في كل  حاجة حيخاف يضحك في وشك لتطلب منه طلب ولا حاجة وبيدخلك دايرة الفقر والألم النفسي لو لاقتيه بخيل أو لاقتها بخيلة حط ديلك في سنانك واجري بأقصى سرعة بعيد. ولو بنتك بتحب شاب فقير إن شاء الله ربنا يغنيه من فضله لأن أكيد الغني هو الهادي هو الله.

 

همسة في أذن والدي البنات

  1jpg

أوعوا تبيعوا عيالكم لحد لمجرد إنه شوال فلوس لأنها لو خرجت من بيتك لوحدها

ممكن ترجع بيتك ومعاها عيال!

أوعوا! وابعدوا عن شماعة "القسمة والنصيب".

 

همسة لكل مقبل(ة) على الزواج

    1jpg

ملحوظة صغننة: 99 % من أمراضنا سببها الضغط النفسي والعصبي

الحزن والقلق والخوف والكره كل دي مشاعر بتؤدي للوفاة سريعا بالسكتات

القلبية والدماغية!

 

فكروا كويس أووووووووي في اختيار شرريك حياتكم لأنه مش بيتكرر ليكم وقبل

ما تدخل في كارثة تحطم كل حياتك وتحطم أجيال معاك.

 

يعني ايه قسمة ونصيب؟

النصيب مكتوب ومعلق باختيارنا! يعني اختياراتنا هي اللي بتحدد كله باختيارك ونحن نتنقل من قدر الله إلى قدر الله. ولكن باختلاف وعينا واعترافنا بأخطأنا. كلنا نحتاج إلى المغفرة والرحمة وكلنا محتاجين نرحم بعض ونتعاون مع بعض، ومحتاجين نفهم اختياراتنا ونراجع نفسنا ونعيد حسابتنا ونقييم علاقتنا مع أزواجنا

لو مضغوطين يبقى الانفصال خير قرار!

 

على الأقل ميبقاش عندنا شماعات والأهم نعرف نربي عيالنا ونعرف نستمتع بحياتنا ونربي جيل غير معقد نفسيا ومحمي من الأزمات النفسية.

مقالات أخرى قد تفيدك

كيف أشعر بالسعادة مع زوجي

قلق فترة الخطوبة

عايز أصرخ

أنواع العلاقات والتعامل مع الناس

العلاج بالحب للأمراض النفسية

إذا جوزك تزوج عليكي

أهم عوامل النجاح الأسري

رفع ذبذبات الاستحقاق

كيف أحلل شخصيتي

كلام مقصود لشخص جرحني

أنواع الشخصيات وسمات كل شخصية

كيفية التعامل مع الشخصيات المستفزة 





دمتم بخير وسلام وسعادة :)
أحمد عبدالله
لايف كوتش ومعالج بالطب التكميلي
ومؤسس نفسيكو www.nafsico.com

لحجز الجلسات رجاء التواصل على 201204900556+

صفحتناي على الفيسبوك:

مجموعة نفسيكو على الواتس What's app، اضغط هنا:
https://chat.whatsapp.com/BwLeRcS1i680PpgWkArvsm 
من خلال مجموعة على Telegram تليجرام، اضغط هنا:
t.me/Nafsico

للمزيد عن اللايف كوتش أحمد عبدالله: LinkedIn:
https://www.linkedin.com/in/ahmed-abdallah-317b00174/